قْصِيدَة الضِّيفْ

Publié le par جمعية هواة الملحون

القصيدة الموالية الرجوع للفهرس القصيدة السابقة

 

استمع للقصيدة بصوت المرحوم محمد بنغانم

 

 

قْصِيدَة الضِّيفْ 

               نظم الشيخ الجلالي امتيرد                                                  مبيت متني

        القسم الأول

سَالُونِي يَاهْلْ الْهْوَا كِيفْ اجْرَالِـــــي           يَامَسْ فَالدّاج ْيَـــــــاكْرَامْ

بَلَّجْتْ اوْصَايْدِ وُسَدِّيتْ قْفَــــــــــــالِي          وَضْحِيتْ انْصَارَعْ الْمْنَامْ

بِينْ افْيَاقْ وُمْنَامْ وَ الضَّوْ اطْفَــــــالِي           نَسْمَعْ مَنْ دَقّْ فَالرّْسَــــامْ

قُلْتْ امَنْ جَاايْسَالْ فَالتَّلْتْ التَّــــــالي           وَالِّيلْ الْيَالْ وَ الضّْــــــلامْ

لَحْتْ اغْطَيَا وُنَضَتّْ مَبْهُوضْ انْلالِي           حَطّيتْ ايْدِ عْلَى الْحْسَــامْ

سَمّيتْ وُزَدَتّْ بَاسَمْ الْحِيْ العَــــــالِي           سَلَّمْتْ وُ قُلْتْ يَاسْــــــلامْ

وَافْتَحْتْ البَابْ مَافْقَهْتْ اشْ اقْبَــــالِي           ضِيفْ اللهْ قَالْ لِي اقْــوَامْ

سَوّلْتُ مَنْ اتْكُونْ زَادْ افْتَنْخَــــــــالِي           وَدْخَلْ مَطْرُودْ كَاسْهَـــامْ

اضِيفْ اللهْ رَدّ لَجْوَابْ اصْغَـــــــالِي           لاتَحْشَمْ رَدّ السّـــــــــلامْ

 

     القسم الثاني

فَالْحِينْ اشْعَلْتْ شَمْعْتِي        وَسْبَلْتْ افْرَاشْ قُبْتِــي       لَمْطَايَبْ طِيبْ الحْدِيتْ

قُلْتْ ابْشُوقِي وُلِعْتِــــي        اجْلَسْ يَا رُوحْ رَاحْتِي      نَزْهَا وْبْكُلّ مَـــــانْوِيتْ

سَبْعيِنْ اسْنََـــــا فْلِيلْتِي        قَرّبْ تَسْطَابْ فَرْجْتِـي      رَدّ اجْوَابِي الَى ادَّوِيتْ


 

دَرْتْ الشَّمْعَا قْبَالْتُ دُونْ اشْمَـــــالِي          َونْحَقَّقْ فِيهْ بَالنّْيَـــــــــــامْ

اتْحَدَّقْ دَاكْ الْحْسِيبْ وَتْبَدَّلْ حَــــالِي           زَادْ الشّمْلا عْلَى الّتـــــاَمْ

وَعْكَُدْ عَبْسَا تْدُوبْ مَنّْهَا لَجْبَـــــــالِي           وَرْجَعْ لِي مَنْ اوْلادْ حَامْ

كُورِمَغْلُوقْ اوْ اشَلْحْ افْتَمْتََـــــــــــالِي           وَلاعَجْمِي مَنْ الْعْجَـــــامْ

هَدَ زَنْزُونْ قُلْتْ وَلابُوهَـــــــــــــالِي           وَلاسَكْرَانْ بَالــــــــــمْدَامْ

قُلْتْ اعَجْبِي الضّيفْ يَغْضَبْ مُحَالِي           ابْلا سَبَّا ابْلا اخْصَــــــامْ

اسَبَّتْ لِعْتِي وُهَوْلِي وَهْوَالِــــــــــــي           يَاتاَرَكْ مُهْجْتِي اسْقَـــــامْ

لَعْنْ الشّيْطَانْ زِدْ يَــــــــانُورْاهْلالِي           وَمَا فَالْغِيبْ مَنْ احْكَــــامْ

اضِيفْ اللهْ رَدّ لَجْوَابْ اصْغَـــــــالِي           لاتَحْشَمْ رَدّ السّـــــــــلامْ


 

القسم الثالث

أسِيدِي قُلْتْ لُ اكْفَـا       تَرْكْ التّيهَانْ وَ الجّْفَا      لََجْوَادْ ابْجُودْهَـــــا اتْرُوفْ 

دِيكْ الشّوفَا العَاطْفَا       قَسْمَتْ قَلْبِي امْنَاصْفَا      حَرّ مَنْ امْضَاوَتْ السّيُوفْ 

لُوَّحْ تَنْكِيرَتْ الخْفَـا      وَشْفاَ يَا ضِيفْ وُنَشْفََا     وَعْطَفْ بَمْكَارَمْ العْطُــــوفْ

 

أَنْتَ فِمَرْسْمِي وُزَايَدْ تَنْخَـــــــــــالِي         اشْ جَابَكْ لِي ابْلا اغْرَامْ

الضْيَافْ كُلّهَاابْلَجْوَابْ اتْشَـــــــــالِي         وَنْتَ لاصُوتْ لا كْــــلاَمْ

نَصْرَمْت ْاعْزَايْمِي وُفَضّيتْ احْيَالِـي         وَعْقيِلِي فَالْوْهَامْ هَـــــــامْ

وَدْوَى مَنْ بَعْدْ مَاسْتَفْسَرْ فَقْوَالِـــــــي         صُوتْ اسْمَعْتُ ابْلا انْغَامْ

كَاصُوتْ اخْنِيسْ فِي ادْوَاخَلْ لَدْخَالِي         مَنْ ضَيْقْ التُّوبْ وَ الّْتَـامْ

طَالَبْ مَفْرُوقْ عَنْ احْبَابِي وَمْتَـــالِي         بَرَّانِي سَاكَنْ الْخْيَــــــــامْ

وَنْفََتَشْ فَالْعْلُومْ مَدُّوبْ اهْــــــــــلالِي         حَافَضْ لَسْوَارْ بَالتّْمَـــــامْ

لاكِنْ افْدَ البْلادْ مَفْقُودْ الـــــــــــوَالِي         لابُ لاخُ لا اعْمََــــــــــامْ

اضِيفْ اللهْ رَدّ لَجْوَابْ اصْغَـــــــالِي           لاتَحْشَمْ رَدّ السّـــــــــلامْ

 

 

القسم الرابع

طَالَبْ مَفْرُوقْ بَلْدْنَا      اطْلَبْنَا لِكْ ضِيفْ رَبّْنَا        نَلْقَاوْ الصَّرْفْ بَلْحْسَانْ

ارْمَانَا ِلكْ وَعْدْنــــا      رَفْعْ اقْدَرْنَا وُعَزّْنَــــا        لاحُكْمْ الخَارَجْ لْوْطَـانْ 

الطَّلْبَا مَعْدَنْ الغْنَــا       انْكَتْبُ لِكْ سَرّْحَرْزْنَـا        تَجْلِيبْ الرَّزْقْ للْمْكَــانْ 

 

الطَّالَبْ قُلْتْ لِهْ مَا كَايَخْفَـــــــــــــالِي            مَعْلُومْ ايْدَكَّرْ الْمْقَـــــــــامْ 

وَنْتَ كَاصِيدْ فُوقْ لَفْضَا ضِيَّــــــــالِي           لَمْسَافَرْ مَاْرجَا امَكََـًــــــامْ 

نَغْزَلْ غَزْلْ الْهْوَى عْلَى حُسْنْ امْقَالِي          وَعْيِيتْ انْوَاجَهْ الدّْمَــــــامْ 

قُلْتْ اشْرَالِّي ايْفِيدْ فِي صَحّْ اعْمَـــالِي           نَبْرَمْتْ ابْخُفَّتْ العْظَـــــامْ 

وَجَّدتّْ اتْفَاكْهِي وُطَبْخِي وََشْغَـــــاِلي           وَرْفَعْتْ الطَّاسْ كَـــاغْلامْ 

مَدّْ ايْدِيكْ قُلْتْ لِهْ يَالشَّاطَنْ بَـــــــالِي           اسْتَاجَبْ وَاجَبْ الطّْعَــــامْ 

مَنَا فَطْعَامْ قَالْ لِّي شُفْ اخْيَــــــــالِي           فَالْعَشْبَا مَاوْفِيتْ عَـــــــامْ 

لَلَّهْ اَلْحَمْدْ  قُلْتْ لُ طِيبْ احْــــــــلالِي           وَ الضَّامَنْ فِيهْ بُوعْــــلامْ

اضِيفْ اللهْ رَدّ لَجْوَابْ اصْغَـــــــالِي           لاتَحْشَمْ رَدّ السّـــــــــلامْ


 

القسم الخامس

َيغْضَبْ لَمْلِيحْ وِيِرْضَا     وَنْتَ يَاَراحَتْ العْضَـــا    مَالَكْ مَنْ جَانْبِي امْرِيضْ

  هَزِّيتُ هَزَّتْ الكََْضَـــا      مَنْ حَرّْ الشُّوقْ وَ الّْضَا     حَــــزْتُ لِيَّ ابْكُلْ غِيضْ

صِيَّحْ مَكْيَاسْ الحْضَـا      حَتَّى سَخْنَا عْلَى الفْضَا     نَكْشَفْ لَحْجَـابْ الْغْلِيضْ

 

نَجْبَرْ تَاجْ الْبْدُورْ عَرَّاضْ الفَاـــــلِي             وَلْفِي سُلْطَانَتْ الرّْيَــــامْ

وَضْهَرْ دَاكْ الجْبِينْ كَـــــابَدْرْ ايْلالِي            وَالْخَدَّادَ مْعَ الْوْشَـــــــامْ

انْتَ هُوَ الضِّيفْ يَالشَّاطَنْ بَـــــــالِي            لَكْدُوبْ افْدِينْنَّا احْـــــرَامْ

قَالَتْ لِي سَالْنِي انْفِيدَكْ بَسْئَــــــــالِي            بَعْدْ انْ سَتْوِيتْ لْلمْنَـــــامْ

حِيَّرْ عَقْلِي اهْوَاكْ يَاعَزّْ ارْجَـــــالِي           وَخْرَجَْتْ انْهِيلْ بَالْقْــــدَامْ

وَخْفِيتْ اعْلَى اعْيُونْ لَعْدَا عُدَّالِـــــي           لَحْضَرْتَكْ شَادَّ احْـــــزَامْ

هَاتْ الصَّفْرَ اوُزِدْ غَدَّرْ قَمْصَــــالِي           قُلْتْ لْهَا مَابْقَى امْنَـــــــامْ

هَادْ اَللِّيلا اخْيَرْ مَنْ كُلْ  الْيَـــــــالِي           لارِيحْ ايْهَبّْ لاغْيَــــــــامْ

اضِيفْ اللهْ رَدّ لَجْوَابْ اصْغَـــــــالِي           لاتَحْشَمْ رَدّ السّـــــــــلامْ

 

 

القسم السادس

خُدْ احَفَّاضْ وَرْتْوَا    ضِيفْ امْنْ اضْيَافْ الْهْوَا     زَهْوَا يَزْهَى الْمَنْ ازْهَــــــاوْ

اَلـــــدُرْ الايْلُ ادْوَا     بَبْدِيعْ امْحَـــــــاسْنُ اضْوَا     بَرْضَاهْ اهْلَ الرّْضَى ارْضَاوْ

وَلِّي بَجْهَالْتُ ادْوَا      مَعْلُـــــــــــولْ وُلايْلُ ادْوَا     مَطْمُوسْ انْوَاجْلُ اعْمَــــــــاوْ

 

قَالْ افْصِيحْ الّْغَا الْحَبْرْ الجِّيــــــلالِي            غُوَّاصْ اجْوَاهَرْ النّْضَــــــامْ

زُوَّاقْ ارْقََايْقِي وُ طَرَّازْ اشْغـــــــاَلِي            وَشْجِيعْ الحَرْبْ فَالّْطَـــــــامْ

هَدَا بَحْرُ اغْمِيقْ وَطْمِيمْ مَـــــــــــالِي           يَرْهَبْ بَفْرَاتْنُ ازْعَــــــــــامْ

كُلُو لَنَّاكَرْ الْعْدِيمْ السَّفَـــــــــــــــــالِي           يَتْادَّبْ عُرَّتْ الغْشَــــــــــــامْ

شِيخْ ابْلا شِيخْ لُو اعْمَرْ جَبْحُ خَــالِي          مَايْلُ مَبْدَا وُلا اتْمَــــــــــــــامْ

غَنَّى جَبْحِي وُ طَعْمْ بَالشَّهْدْ امْصَالِي           وَ السَّعْدْ اعْلَى الرّْضَا اسْكًََامْ

اعْمَرْ سُوقِي وُ بَاعْ وَ شْرَى دَلالِــي           سُوقْ الافَرْغْ مَنْ ازْحَــــــامْ

طَابْ ارْيَاضِي الْفَحْ بَالْقَلْبْ السَّــالِي           وَعْبَقْ بَقْلايَدْ النّْسَــــــــــــامْ

وَسْلامِي لَلدّْهَاتْ بَمْسَكْ وَغْـــــوَالِي           مَافَاحْ الْوَرْدْ بَالنّْسَــــــــــــامْ

وَعْلَى الْوَدْ بَا الفَايْقِينْ ابْتَفْصَـــــالِي           مَاطَالْ الْحَـــــــــــالْ بَالدّْوَامْ

اضِيفْ اللهْ رَدّ لَجْوَابْ اصْغَـــــــالِي            لاتَحْشَمْ رَدّ السّـــــــــــــــلامْ

 

 

 

القصيدة الموالية الرجوع للفهرس القصيدة السابقة

 


Commenter cet article