قصيدة افشيت بالغيض اسراري

Publié le par جمعية هواة الملحون

 من ديوان شعر الملحون بالمغرب
منشورات جمعية هواة الملحون بمراكش
ديوان زاوية الحضر

قصيدة افشيت بالغيض اسراري

نظم الشيخ امحمد البوعمري 

انشاد عبد الجليل فرحي

bouanri couv

القسم الأول 

أَفْشِيتْ بَالْغِيظْ اَسْرَارِي

قَلّْ صَبْرِي وَقْصَدْتْ اَلْغَايْرِينْ وَاَلْقَلْبْ اَمْغَيَّرْ

ضَاقْ صَبْرِي وَافْكَارِي

كِيفْ نَصْبَرْ وَحْبِيبِي فَالْبْلاَدْ مَغْتَاظْ اَمْكَدَّرْ

بَانْ صَفْوِي وَغْيَارِي

لاَشْ نَكْتَمْ وَنَا حَالِي اَضْعِيفْ وَاَلْحَمْلْ اَمْزَيَّرْ

اشْكِيتْ وَرْفَعْتْ اَضْرَارِي

اَبْحُجّْتْ السَّبْعْ اَلْغْيَارْ اَمْقَامْ لَحْبِيبْ اَسْتَظْهَرْ

قُلْتْ فَحْضَرْتْ اَنْصَارِي

اِيْغَارْتْ اللَّهْ اَسْعِيتْ اَفْبْلَدْكُمْ وَاَلْعْقَلْ اَمْحِيَّرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ 

 

القسم الثاني

زَكتْ وَنْشَرْتْ اِيزَارِي

هَمَّتْ اَعْبِيدْ  اَلْحُرْمْ اَلْحَارْسِينْ تَخَلي وَتْعَمَّرْ

طِيبْ رُوضِي وَزْهَارِي

مَنْ اَنْفَاسْ اَلْمَحْبُوبْ اَلِّي اَمْعَاهْ قَلْبِي مَسْتَحْضَرْ

فِيهْ وَرْدِي واذْكَارِي

اَقْبَلْتْ رُوحِي بَنْشَوْتُ فَالْوُجُودْ وَلْهَانْ امْسَكَّرْ

ضْوَاتْ بَسْنَاهْ اَوْكَارِي

كِيفْ يَنْكَدْ وَحْدِيثُ فَالْقِلِيبْ مَحْبُوبْ اَمْأَثَّرْ

بَاحْ بَالْقَصْدْ اَهْزَارِي

فْعَرْشْكُمْ وَعْرَضْ بَسْرَارْكُمْ فَمْشَاهَدْ لَحْضَرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم الثالث

 

خَالَفْ اَلْحُكْمْ اَلْجَارِي

اَفْحُرْمْكُمْ وْجَاوَزْ حَدْ اَلْاخْدُودْ وَطْغَى وَتْجَبَّرْ

ضيَّق اَبْنُورْ اَبْصَارِي

اَلْحَاجَبْ فْعِينْ اَلْقَلْبْ بْلاَ اسْبَابْ وَغْلَطْ وَتْفَهَّرْ

حُرْمْتْ اَنْسَا وَدْرَارِي

اَبْعَلْمْكُمْ اَهْتَكْهَا زُورْ وَفْجُورْ وَسْجَرْ وَتَأَمَّرْ

طَوَّلْ يَدُ فَجْوَارِي 

اَحْضَرْتْكُمْ وُشِيَّطْ وَاشْ اَلْمْقَامْ عَنْكُمْ اَمْحَجَّرْ

رَجِيتْ مَنْ جْمَعْ اَخْيَارِي

سِيفْكُمْ اَلْقَاطَعْ يَبْرِي اَعْضَاهْ وِيعَاوَدْ لَخْبَرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم الرابع

 

عَمّْ سَهْلِي وَاوْعَارِي

كِيفْ يَتْصَوَّرْ فَبْلاَدِي يْحُومْ وَعْلِيهْ اَنْقَصَّرْ

ارْمِتْ غِيرُ بَجْمَارِي

كِيفْ بَالسَّبْ اَرْمَى كَمْ مَّنْ وْصِيفْ مَعْتُوقْ اَمْحَرَّرْ

فِيهْ مَدِّيتْ اَظْفَارِي

كِيفْ مَدّْ اَلْسَانُ فَمْقَامْكُمْ بَالْغَشّْ وُالَمْكَرْ

ضَرْبَتْ اَسْيُوفْ اَبْرَارِي

فْدَاخْلُ مَجْبُودَا وَخْوِيتْ فِيهْ مَا كُنْتْ اَنْعَمَّرْ

دَايَمْ اَلْمُلْكْ اَلْبَارِي

أَثْرُ مَنْ هَدَ اَلْقُطْرْ السّْعِيدْ فَقْرِيبْ اِيْغَبَّرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم الخامس

 

صَلْتْ لَيْلِى وَنْهَارِي

نَبْتْ عَنْ مَحْبُوبِي وَعْلَى الرّْقِيبْ مَحْزُومْ اَمْشَمَّرْ

شِيَّبْ اَنْفَاهْ اَعْدَارِي

فَرْعْ  مَنْكُورْ عَادْ فْسُوقْكُمْ يُوزَنْ وِيْعَبَّرْ

جَرَّعْ اَكْيُوسْ اَمْرَارِي

بَالْعْمَى بَشَّرْتُ وَمْسَى اَدْلِيلْ مَجْهُولْ اَمْنَكَّرْ

صَادَفْ سَهْمْ اَشْبَارِي

اَفْلَجَّتْ اَلْهُولْ اَمْرَكَّبْ دُونْ رَيْبْ مَكْسُورْ اَمْعَمَّرْ

لُو اَتْقَى صَهْدْ اَشْرَارِي

مَا يْحَرَّكْ سَاكَنْ وَهْلُ اَفْحُولْ تَكْسَرْ وَتْجَبَّرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم السادس

 

حَامَتْ اَعْلِيهْ اَطْيَارِي

كِيفْ يَسْلَمْ وَعْبيدْ الدَّارْ بِهْ حَطَتْ فَاَلْمَشْوَرْ

دَايْرَا بِهْ اَصْوَارِي

وَاَلْبْوَابْ اَنْغَلْقَتْ وَمْسَى فْرَمسْ لَحْزَانْ اَمْقَبَّرْ

كِيفْ يَهْتَكْ عَنْ جَارِي

حُرْمْتُ وَاَلْحَرْبَا فِيدُ اَشْحَالْ مَنْ سَفَّاكْ اَزْبَرْ

صَاحَبْ اَلْحُكْمْ اَيْدَارِي

وَاْلْفْقِيرْ اَلْعَاجَزْ للَنَّاسْ حَالَتْ اَلْفْقْرْ اِيْظَهَّرْ

شَاعْ فَالْوَقْتْ اَخْبَارِي

لاَشْ مَا نَتْرَدَّدْ فَبْوَابْكُمْ وَنْصُولْ وُنَفْخُرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم السابع

 

اَهْتَكْتْ فَاَلْحُبّْ اَسْتَارِي

غَابْ عَقْلِي وَظْهَرْتْ لْهَلّْ اَلْحَالْ مَاكُنْتْ اَمْضَمَّرْ

يَاهَلْ السَّرّْ السَّارِي

مَنْ اَسْتَاغَتْ بِكُمْ اَيْصِبْكُمْ فَالسَّرّْ اوُ لَجْهَرْ

اَحْمِيوْ بَالسِّيفْ اَقْطَارِي

مَنْ اَسْعَى فَحْمَاكُمْ وُطَافْ بِهْ يَحْلَقْ وِيْقْصَّرْ

اَقْضِيوْ بَالْعَزْمْ اَوْطَارِي

عَادَتْ اَشْرَافْ اَلْقُومْ اَهْلَ اَلْحْسَانْ تَفْدِي لَمْيَسَّرْ

اَفْدِيوْ مَنْ لَعْدُو ثَارِي

فِي اَنْكَبْتُ عِبَرْ اَلْمَنْ اَعْمَاهْ جَهْلُ وَتْطَوَّرْ

يَاهَلْ السِّيفْ اَلْبارِي

طَابَعْ السَّرّْ فَخْصِيمِي بَيّْنُوهْ الاَمَرْ بِهْ اِصْدَرْ

 

القسم الثامن

 

شَرْتْ وَخْلَعْتْ اَعْدَارِي

سَرّْكُمْ اَظْهَرْ لِي وَمْقَامْكُمْ بِكُمْ اَمْعَمَّرْ

اَجْنِيتْ بِكُمْ اَثْمَارِي

نِيلْكُمْ اَلْوَاصَلْ وَشْرَابْكُمْ فَالْقَلْبْ اَمْطَهَّرْ

اَصْفُوفْ خُوضِي وَكْدَارِي

لاَ تْغَفْلُ وَانْتُمْ اَلْوَاقْفِينْ فَالنَّفْعْ وُفَالضَّرْ

اَجْمِيعْ وَكْدُ فِي عَارِي

فِي اَقْرِيبْ اَنْشَاهَدْ لَمَّنْ اَهْوِيتْ لِيغَارَا اَتَحْضَرْ

ابْسَطّْ خَدِّ لَحْبَارِي

وَالسّْلاَمْ اَلْنَاسُ مَنْ طِيبْكُمْ لَغْزِيرْ اَمْعَطَّرْ

Commenter cet article