قصيدة الفجر للغرابلي

Publié le par جمعية هواة الملحون

 


القصيدة الموالية الرجوع للفهرس القصيدة السابقة

 

استمع للقصيدة بصوت المرحوم التهامي الهاروشي

 

 

قَصِيدَة اَلْفَجَرْ

 

نظم أحمد الغرابلي                                                مبيت رباعي

 

القسم الأول

 

يَقَّضْ جَفْنَكْ فِقْ يَالسَّاهِي تَنْظَرْ لَسْــرَارْ          قُمْ اَتْمَرَّحْ لَبْصَــارْ

سَرْ اَلْحَقّْ وُعَتْبَــارُ            مَنْ خَلْقْ الدَّنْيَا وُ حِيّْهَا وَسْمَاهَا وَمْلاَكْــهَا

 

شُفْ اَهْمَامْ اَلدَّاجْ كِيفْ تَاكًْ فْعَسْكَرْ جَـرَّارْ        وَمْلَكْ سَايَرْ لَقْطَـارْ

عَمَّرْ لَقْفَرْ وَجْــدَارُ             وَخْيُولُ دَهْمَا مْسَرّْجَا وَكْوَارَا رَكَّابْـــــهَا

 

شُفْ اَنْجُومْ اَلْفَلْكْ وَالتّْرِيَّا شَرْقَتْ بَنْـــوَارْ        شُفْ الْبَدْرْ السَّيَّــارْ

شُفْ اَنْجَمْتُ فَتَــارُ            شُفْ الَهَلاَّ بِهْ دَايْرَ بَحْكَمْتْ اَلِّي زَانْــــــهَا

 

شُفْ اَلْمَرِّيخْ اَلْوْضِيحْ لَمْجَلِّي عَلْ لَسْحَــارْ       مَنْ ضَيْ اَلْجَوْزَا غَار

ْ شُفْ اَلْعَدْرَا فَجْــوَارُ          شُفْ اَلْعُطَارِيدْ فَاقْ عَلْ لَكْوَاكَبْ  وَنْوَانْـــهَا

 

شُفْ اَلْمُشْتَارِ مْعَ اَنْجُومْ اَسْعِيدَا تُدْكَـــارْ         وَالدَّبْدُوحْ اَلْمَسْــرَارْ

وَالرَّحَالْ اُ مَحْضَـارُ            شُفْ الزُّهْرَا  زَانْتْ اَلْمْحَافَلْ مَنْ حُسْنْ اَجْمَالْهَا

 

وِادَا عَكُْبْ الدَّاجْ بَالصّْدُودْ يْوَلِّي لَدْبَـــارْ          يَطْلَعْ نَجْمْ اَلْغَــرَّارْ

لَهْمَامْ اَرْسَلْ بَشَّـارُ            وَسْرَارْ اَلْمَعْبُودْ مَا يْطِيقْ اَلْعَبْدْ اَلْتَوْصَافْـــهَا

 

شُفْ اَلْفَجْرْ اَضْوَى بْنُورْ فَايَقْ عَنْ كُلّْ اَنْوَارْ    وَعْلاَمُ فِي تَشْهَــارْ

جَابْ خْيُولُ لَعْقَـارُ             وَهْزَمْ جُنْدْ الِّيلْ بَالْمْحَالْ اَلِّي مَا يَقْوَا لْـــهَا

 

القسم الثاني

 

هَبّْ اَنْسِيمْ اَلصُّبْحْ مَنْ ضْيَاهْ اِمِيسُ لَشْجَارْ      بِينْ اَجْدَاوَلْ لَنْهَـار

وَالزَّهْرْ اَغْرَمْ دِينَـارُ           وَ اَلنَّسْرِ وَاَلْيَاسْمِينْ عَدْرَى حَنْطَتْ فِيزَارْهَــا

 

وَاَلْخَبُورْ اَنْحِيلْ مَنْ اَهْوَاهَا فَانِي مَصْفَـارْ        نَعْنِي عَاشَقْ صَبَّـارْ

كَاتَمْ سَرُّ فَسْيَـــارُ              وَذَا فَرْقَاتُ وُلِيفْتُ مَا يَقْوَى لَفْرَاقْـــــــهَا

 

وَالْوَرْدْ اَلْبَسْ حُلَّتْ اَلنّْصَرْ بَالْوَاجَبْ يُنْصَارْ      وَحْدَهْ اَلْخَيْلِي جَــارْ

وَالْفَنّْ وُلَحْكُمْ جَـارْ             وَعْلُومْ اَلسُّوسَانْ وَاَلْعْطَرْشَا تَهْجي بَنْسَامْهَا

 

وَاَلنََّرْجِيسْ وَالْيَاسْ وَ اَلْقْرَنْفَلْ مَنْ لَبْهَا غَارْ     واَلْمُخْبِيرْ اَلْبَشَــارْ

وَاَلدِّيدِي فَتْحْ اَنْــوَارُ          بِينْ اَصْفُوفْ اَلْخِيزْرَانْ تِكًَفَّا زُوجْ اَلْوَانْـــهَا

 

وَاَلطَّمَّاجْ اُقِيقْلاَنْ بِينْ اَبْلَنْزَاتْ اَحْـــرَارْ           وَاَلْبَهْجَا وَاَلْجَــلاَرْ

وَاَلْبَانْ اَبْسَمْ بَتْغَــارُ           هَدَا سَرّْ اَعْظِيمْ فِي اَعْشُوبْ اَلْبِيدَا وَنْــوَارْهَا

شُفْ اَلْفَجْرْ اَضْوَى بْنُورْ فَايَقْ عَنْ كُلّْ اَنْوَارْ    وَعْلاَمُ فِي تَشْهَــارْ

جَابْ خْيُولُ لَعْقَــارُ             وَهْزَمْ جُنْدْ الِّيلْ بَالْمْحَالْ اَلِّي مَا يَقْوَا لْـــهَا

 

القسم الثالث

شُفْ اَلدَّهْبِيَّا اَطْلُوعْهَا زَهْوَ لََلنَّْظَّــــارْ             وَصْغَ نَغْمَتْ لَطْيَـارْ

بَصْوَاتْ اَلاَّ يُحْصَـارُ           شُفْ اُمْ اَلْحَسَنْ كِيفْ هَاجَتْ بَشْعَارْ غْرَامْــهَا

 

وَاَلْحَدَّادْ اَحْرِيجْ هِيَّجْ اَلسَّمْرِيسْ وُكَنَـــارْ         وَاَلْحَرْبَلْ وَاَلْهِيــزَارْ

وَاَلْبُوحْ اِجِيبْ اَشْعَـارُ         وَاَلْوَرْشَانْ اِجَاوْبْ اَلْمْغَانِي وَيْرَدّْ عْنَـــــادْهَا

 

وَاَلْفَخْتْ وُلِيمَامْ رُنْقُو اَلْحَضْرِ عَلْ لَحْضَـارْ       وَاَلْبُلْبُلْ بَخْتِصَــار

ْ قَايَمْ لِيلُ وَنْهَـــارُ              وَاَلْعَصْفُورْ اِجَاوْبْ اَلْطْيَارْ بَصْوَاتُ لَصْوَاتْـهَا

 

مَخْتَلْفِينْ اَصْوَاتْهُمْ كِيفْ اَخْتَلْفُ لَفْكَـــارْ          فَاقُ نَغْمَتْ لَوْتَـــارْ

وَالْقَانُونْ اُيَضْمَــارُ            نَعْنِي رَصْدْ الدَّيْلْ فِي طْبُوعْ اَلْأَلَى وَسْجَلْـــهَا

 

وَغْرِيبْتْ لَحْسِينْ وُلِسْتِهْلاَلْ كْمَا يُدْكَــارْ          وَالرَّمْلْ يْجِيبْ اَخْبَـارْ

وَصْبِهَانْ مْنَ اَدْيَـارُ            حَمْدَانْ وُزِيدَانْ وَاَلْحْكًازْ وُ مَيَا وَشْكَالْـــهَا

 

شُفْ اَلْفَجْرْ اَضْوَى بْنُورْ فَايَقْ عَنْ كُلّْ اَنْوَارْ    وَعْلاَمُ فِي تَشْهَـــارْ

جَابْ خْيُولُ لَعْقَــارُ             وَهْزَمْ جُنْدْ الِّيلْ بَالْمْحَالْ اَلِّي مَا يَقْوَا لْـــهَا

 

القسم الرابع

 

فَكًَدْنِي لَخْبِيرْ فِي اَعْقِيلاَ دُرَّتْ لَحْــــرَارْ           حُسْنْ اَبْهَهَا  مَسْـرَارْ

بَعْدَتْ رَسْمِي وَقْـرَارُ          لاَزَلْتْ اَنْرَاجِي شْمَنْ اَنْهَارْ نْكًبَّلْ لَوْطَانْـــهَا

وَنْشَاهَدْ لَجْحَافْ وَاَلْخْبِيرْ اُعَلاَّمْ اَلــــدَّارْ          وَالدَّاجْ اَمْثِيلْ اَنْهَــارْ

لِهْ اَمْشَاعَلْ سَتْنَـارُ            وَنَا بِينْ اَمْحَافَلْ اَلرّْكَبْ وَهْجَايَمْ فَكًْطَــارْهَا

 

وَاَلْمَحْمَلْ تَزْهَى بْفَرْجْتُ لَبْوَادِي وَمْصَـارْ        تَاتِي مَنْ كُلّْ اَقْطَـارْ

فَحْمَا لَيْلَى نُحْصَـارْ            وَنْطُوفْ بَمْقَامْهَا جْمِيعْ فْسَاعَتْ لَمْوَاجْـــهَا

 

نَسْعَى وَنْلَبِّي وَنَحْرَمْ وَنْقَبَّلْ لَحْجَـــــارْ            وَنَا خَالَعْ لَعْــــدَارْ

بِينْ اَلشّْفِيعْ اُغَفَّــارُ           وَنْرَى دَاتْ اَلزِّينْ بَارْزَا لِي فَحْرَامْ اِيـــزَارْهَا

 

اَلْفَجْرْ وَقْتْ اَلْخِيرْ يَالسَّاهِي يَقَّظْ لَفْكَــارْ          وَسَالْ عَالَمْ لَسْــرَارْ

بَاَلْقُرْءَانْ وُ بَسْــوَارُ           يَجْمَعْنَا فَمْقَمْهَا اَلسّْعِيدْ وُ نَقْبَارُ عَنْـــــدْهَا

 

شُفْ اَلْفَجْرْ اَضْوَى بْنُورْ فَايَقْ عَنْ كُلّْ اَنْوَارْ    وَعْلاَمُ فِي تَشْهَـــارْ

جَابْ خْيُولُ لَعْقَــارُ             وَهْزَمْ جُنْدْ الِّيلْ بَالْمْحَالْ اَلِّي مَا يَقْوَا لْـــهَا

 

القسم الخامس

 

نَهِيتْ اَلْحُلاَّ اَلرَّيْقَا بَرْقَايَقْ لَشْعَــــــارْ             كَاعَدْرَا مَنْ لَبْكَـارْ

تَفْجِي لَلْقَلْبْ اَغْيَــارُ      لَصْحَابْ اَلتَّسْلِيمْ بَاَلرْضَى تَهْدِي صَرْفْ اَمْدَامْهَا

 

وَاَلْجَاحَدْ تَسْقِيهْ سَمّْ خَارَقْ وَحْدَجْ وَ مْــرَارْ      وَتْزِيدُ نَارْ فْنَــــارْ

تَلْهَبْ قَلْبُ وَسْيَــارُ            مَهْمَا يَصْغَاهَا وُ لاَيْصِيبْ اَلقُدْرَا لَجْوَابْـــهَا

 

كِيفْ اِطِيقْ اِيجَاوْبْ اَلضّْرَاغَمْ مَعْمِي لَبْصَارْ    مَنْ لاَ يَحْسَنْ يَضْمَارْ

                    فَاشْ يَنْفَعْ كًـــُدَّارُ             وِ غَشَّمْ لَفْزُوعْ بَاَلْبْهُوتْ اُ يَسْرَقْ لَحْبَـــارْهَا

 

وِيعَارَضْ اَلْمَيْتِينْ وِ يجَاوْبْهُمْ بَاَلْعَــــارْ           مَنْ لاَ يَرْفَعْ بَكْبَـارْ

لِيسْ اِرَفْعُوهْ اَصْغَـارُ          مَنْ قَلَّتْ حَسْبُ اِلَى تْكَلَّمْ قُدَّامْ اَخْيَــــارْهَا

 

وَسْلاَمِي نَهْدِيهْ بَاَلْعْطَرْ وَنْسَايَمْ لَزْهَــــارْ         لَهْلْ اَلْمَعْنَى لَحْبَـارْ

وَاَلرَّحْمَا لَلِّي سَــارُ            أِفَيَّضْ رَبِّي بْحُورْهُمْ اُ يَسْقِينَا مَنّْـــــــهَا

 

وَسْمِي يَا رَاوِ اَنْبَيّْنُ فَنْهَايَتْ لَسْطَـــــارْ           قَالْ اَلْحَبْرْ اَلْعَيَّــارْ

فِي بَهْجَتْ فَاسْ اَخْبَارُ        وَاحَدْ وَ تْمَنْيَا زِدِ رَبْعِينْ وُ رَبْعَا بَعْـــــدْهَا

 

شُفْ اَلْفَجْرْ اَضْوَى بْنُورْ فَايَقْ عَنْ كُلّْ اَنْوَارْ    وَعْلاَمُ فِي تَشْهَــارْ

جَابْ خْيُولُ لَعْقَــارُ             وَهْزَمْ جُنْدْ الِّيلْ بَالْمْحَالْ اَلِّي مَا يَقْوَا لْـــهَا

  انتهت القصيدة

 

 


القصيدة الموالية الرجوع للفهرس القصيدة السابقة

 

Commenter cet article