قصيدة هَشُّومَا

 استمع للقصيدة بصوت المرحوم محمد بوستة 

قصيدة هَشُومَا

نظم الشيخ الجيلالي امتيرد                                            مبيت ثلاثي

القسم الأول

اَمَحْلاَ لَرْيَـــــامْ لِيلْتْ يْكُونُ فِي حَضْرَا اِيكًَبّْحُ عَلْ لِيمَنْ وَشْمَـــــــالْ

تَتْبَهَا وَتْزِيدْ فَاَلنّْضَرْ              وَتْجَدَّدْ لِيعْتْ اَلْقْلُوبْ اَلْمَكْلُومَا

دِي تَفْخَرْ عَنْ دِيكْ بَارْزَاتْ اَفْحُلاَّتْ اَدْبَاجْ رَيْقَــــــا تَشْجَارْ وُتَكْلاَلْ

بَلْهِيبَا وَهْيَاجْتْ اَلصّْغُرْ           وَاَلنَّغْمْ اَلدَّاوْدِي سْرِيعَا مَنغُومَا

مَنْ لاَلُ كَبْدَا قَاسْحَا مَا شَـــــــاهَدْهُمْ مَا دَا لهم اِيمَــــــارَا مُحَــــــالْ

اَشْ يْعِيدْ قْلِيلْ اَلصّْبَرْ             قَلْبُ هَنَّاهْ مَانْلُومُوهْ اَبْلُومَــــــا

مَعْظَمْهَا فَرْجَا اَغْنَمْتْهَا تَدَّاوَلْ بِهَا اَلْسُونْ لَهْوَ مَا طَالْ اَلْحَـــــــــــالْ

شَلاَّ مَا تَحْكِي اَقْوَى اَكْثَرْ         فَرْجَا مَنّْهَا ضْحَاتْ لَوْشَا مَحْرُومَا

غَدَّرْ كَاسِي هَاتْ نُوبْتِي يَاسَقِي وَسْقِ اَلْبَهْيَا زِينَتْ نَقْطْ اَلْخَــــــــــالْ

لاَ تَغْفَلْ عَنْ رَايَتْ اَلنّْصَرْ       مَصْبَاحْ اَلْوَلْعَاتْ وَلْفِي هَشُّومَا

القسم الثاني

عروبي

وَكًَضْ لَلصَّفْرَا اَبْطَالْهَا وَاشْ اَمْنْ اَمْنَامْ اِيزْهَا لْمَنْ زَرُوهْ اَبْلُوصَالْ

كُبّْ اُدَوَّرْ طَاسْتْ اَلْخْمَرْ         فَاجِي فَاجِي عْلَى اَلْقْلُوبْ اَلْمَكْلُومَا

لاَ لَدَّا مَنْ دُونْ اَلنّْسَــــا جَعْلْ اللهْ اَكْلاَمْهُمْ يَسْرِ فَلْقَلْبْ اَمْصَــــــــالْ

مَنْ لاَ يَهْوَاهُمْ يَنْعْدَرْ              عَايَشْ وَمْعِيشْتُ مْعِيشَا مَدْمُومَا

طُفْ عْلَى اَلْحَضْرَا بْكَسْهَــــــــا شَمَّرْ دِيلَكْ يَانْدِيمْ رَاقَبْ لِيلَكْ مَزَالْ

لِيلَتْ لُوصَالْ لِيلَتْ اَلسّْهَرْ        بَكًْرَايَحْهَا اَلْنَاسْ لَهْوَى مَعْلُومَا

شُفْ اَبْنَاتْ اَلْحَيّْ كَاكْوَاكَبْ تَخْطَفْ ضَيّْ اَلْبْصَارْ بَمْحَاسَنْهَا وَجْمَالْ

حُزْ اَحْبِيبَكْ حُزّْتْ الصّْدَرْ       حُوزَتْ لَكْرَامْ لِيلْتْ تَمْسَا مَكْرُومَا

غَدَّرْ كَاسِي هَاتْ نُوبْتِي يَاسَقِي وَسْقِ اَلْبَهْيَا زِينَتْ نَقْطْ اَلْخَــــــــــالْ

لاَ تَغْفَلْ عَنْ رَايَتْ اَلنّْصَرْ       مَصْبَاحْ اَلْوَلْعَاتْ وَلْفِي هَشُّومَا

القسم الثالث

عروبي

لاَبَعْدْ اَلسَّلْوَا هْنَا وَلاَبَعْدْ اَلزِّينْ فْرَاحْ فَرْحْتُ مَا يَفْدِيهَا مَـــــــــــالْ

بِهْ الْعَقْلْ اِغِيبْ وِيحْضَرْ         وَاَلْقَلْبْ يْبُوحْ بَلْسْرَارْ اَلْمَكْتُومَا

خَضْعْ اَلْطَاعَتْهُمْ يَالسَّاقِي وَالْغَالَبْ لِهْ مَا طْلَبْ قَالْتْ نَاسْ الْحَــــالْ

بِهَا غُلْبْ اَرْجَالْهَا قْهَرْ            تَظْلَمْ وِيلاَ اَشْكَاتْ تَرْجَعْ مَظْلُومَا

صَارْ اَلسَّاقِي بَلْهْوَ يْهَادِي حَتَّى وَلاَّتْ كَاتْنَادِي بَلْسَانْ الْحَـــــــــالْ

طَارْ اَحْيَاهَا مَا بْقَا وْقَرْ           تَرْقَصْ وَتْشِيرْ بَلْكْمَامْ اَلْمَرْكَُومَا

كُلّْ اَوْنِيسْ مْعَ وْنِيسْتُ مَبْشُورِينْ اَمْخَمّْرِينْ عَزّْ اُرَفْعَا وَكْمَــــــالْ

لاَهَجْرَا لاَتِيهْ لاَنْفَرْ               لاَقَلْبْ اَنْكِيدْ لاَجْوَارَحْ مَهْمُومَا

غَدَّرْ كَاسِي هَاتْ نُوبْتِي يَاسَقِي وَسْقِ اَلْبَهْيَا زِينَتْ نَقْطْ اَلْخَــــــــــالْ

لاَ تَغْفَلْ عَنْ رَايَتْ اَلنّْصَرْ       مَصْبَاحْ اَلْوَلْعَاتْ وَلْفِي هَشُّومَا

القسم الرابع

عروبي

كُبّْ اُزِيدْ مْلاَ وُهَاكْ وَرَا يَسَاقِي مَنْ امْدَامْنَا لاَ تَصْحَبْ طَمْطَـــــالْ

رَاحْ الِّيلْ وُعَلّْمْ الْفْجَرْ            وَنْظَرْ لَعْسَاكَرْ الدّْحَامَسْ مَهْزُومَا

صَبْحْ اصْبَاحْ انْهَارْنَا وُجَدّْدْنَا لِهْ اسْرُورْ مَالْهَا عَلْ لُوْصَافْ امْثَالْ

لِيسْ اغْنَمْهَا قِيسْ فَلْعْمَرْ          فَزْنَا وَسْطَابْنَا افْرَايَجْ مَنْغُومَا

نَادَانَا طِيرْ الَفْرَاقْ بَلْعَزْمْ يْنَادِي مَا بْقَا امْكًـــــامْ الرَّاحَلْ يَحْتَـــــالْ

وَدْمُوعْ الَعُشَّاقْ تَنْهْمَرْ            صَبْرِ عَنْهُم كَنْ صَبْرْ الْمَفْطُومَا

وَدَّعْتْ السَّاقِي وُسَارْ وَالْقَوْمْ اتْكَايْدْ فِي جْرَاحْ سِيفْ الْبِينْ الْقَتَّــالْ

رَاحُ كَغُزْلاَنْ لَلْوَكَرْ               كُلّْ اخْلِيلاَ مْشَاتْ كًبَّلْتْ الْحُومَا 

غَدَّرْ كَاسِي هَاتْ نُوبْتِي يَاسَقِي وَسْقِ اَلْبَهْيَا زِينَتْ نَقْطْ اَلْخَـــــــالْ

لاَ تَغْفَلْ عَنْ رَايَتْ اَلنّْصَرْ       مَصْبَاحْ اَلْوَلْعَاتْ وَلْفِي هَشُّومَا

القسم الخامس

عروبي

الجِّيلاَلِي مَا دْخَلْتْ عُمْرِ لَشْبُوكْ وُلاَ قْبَحْتْ بَقْبَاحْتْ هَلْ لَسْفَـــــــالْ

صَحّْ الْقَوْلْ اِعِيدْ الْخْبَرْ           وَقْلُوبْ الْخِيرْ لَسّْعَادَ مَلْهُومَا

وَالْجَاهَلْ يَكْفِيهْ غَلّْ جَهْلُ وَالْجَاحَدْ لَجّْحِيمْ وَالْحَاسَدْ لِيسْ يْنَـــــــــالْ

صُنْعْ اللهْ الْمَالَكْ الْكْبَرْ            مَنْ وَدَّعْهَا كْمَا النّْسَامْ الْمَنْسُومَا

وَنْهَايْتْ لَكْلاَمْ قَالْ عَاشَقْ لَرْيَــــــــــامْ اَلاَّ يْلُ فْعَشْقْ اهْوَاهُمْ ابْدَالْ

مَنْ صُغْرِ وَنَا عْلَى السّْقَرْ        خِيلِي وَخْيُولْهُمْ دَِايَمْ مَلْجُومَا

وَسْلاَمْ الْمُولَى عْلَى الْشْرَافْ  اُطَلْبَا وَعْدَادْ كُلّْ مَا خَايَلْ كَلّْ اخْيَالْ

وَمَا فَاحْ الْوَرْدْ وَالزّْهَرْ           مَا دَامْ السَّرْ فَلْجْبَاحْ الْمَنْعُومَا

غَدَّرْ كَاسِي هَاتْ نُوبْتِي يَاسَقِي وَسْقِ اَلْبَهْيَا زِينَتْ نَقْطْ اَلْخَـــــــالْ

لاَ تَغْفَلْ عَنْ رَايَتْ اَلنّْصَرْ       مَصْبَاحْ اَلْوَلْعَاتْ وَلْفِي هَشُّومَا

تمت القصيدة